港島人的5件事 返中環工可以瞓多粒幾鐘

電車應否廢除引起不少港島人的迴響。港島除了電車外，日常生活亦有特別細微之處，像《新界人的5個苦處》一樣，港島人的事，你會否感同身受？

1. 日日搭叮叮

前政府規劃師薜國強一句提出廢除電車即令群情洶湧，因為「叮叮」陪伴港島人走過不少日子。相比港鐵，「叮叮」只需2.3元便可以遊遍港島。【電車10個小秘密 最高時速是......】

「叮叮」亦有「魯芬變朱茵」的特效，任何人只要坐在車窗旁若有所思地吹一吹風，頓時升級變文青，連一呼一吸都帶有男神女神氣息。所以「叮叮」可以說是港島人的驕傲！

2. 返中環工可以瞓多粒幾鐘

住港島地鐵沿綫的港島人最嘆的當然是返灣仔、金鐘及中環office工，典解? 因為每日可以瞓到早上8點鐘，起身衝入廁所擦牙洗面，用廿分鐘時間出門口，搭正9點就安全返到office，但隔離的同事Tony 住天水圍，sorry ，他每日要6點半起身，屈指一算，一年下來，港島人返港島工可以瞓多360個鐘。

每次同事問住邊? 只要住港島的OL 答一句: 「住灣仔」，所有人都會投以羨慕眼光，然後會酸溜溜地說﹕「你就好啦，我住屯門，返工要個半鐘呀！」

3. 在那遙遠的新界

對於港島人而言，界限街以北甚至比日本台灣更陌生，搭飛機次數一定比搭輕鐵多。港島人去新界就像「二萬八千里長征」一樣，如非必要都不會去天水圍、元朗及屯門。朋友問﹕「點去濕地公園? 」10個港島人有8個可能答﹕「幫你google下，我只識去海洋公園」

4. 吃飯總是「港島價」 

港島不但樓價較高，連外出飲食也有「港島價」。但其實住港島不等於住半山，不少港島人的收入並不是特別高，但食早餐的價錢卻總是「高人一等」，真的有苦自己知。

港島人去一般茶餐廳食一碗牛腩麵加碟油菜，埋單最少50元，普遍較九龍新界貴。

5. 示威遊行好方便

去年的佔中運動，不少港島人置身其中，選擇日以繼夜，夜以繼日地流連金鐘及銅鑼灣一帶，對港島人來說，遊行示威十分方便。住屯門的「老死」成身臭汗想沖個靚涼? No Way 因為回家路途太遙遠！

雖然家住香港仔的也是港島人，到中環金鐘一帶也要過隧道，但港島人返港島工總比新界人幸福吧！